Rehman Faris
mujhe gharaz hai sitare na mahtab ke saath
chamak raha hai ye dil puuri ab-o-tab ke saath
napi-tuli si mohabbat laga bandha sa karam
nibha rahe ho ta.alluq baḌe hisab ke saath
main is liye nahin thakta tire ta.aqub se
mujhe yaqin hai ki paani bhi hai sarab ke saath
saval-e-vasl pe inkar karne vaale sun
saval ḳhatm nahin hoga is javab ke saath
ḳhamosh jhiil ke paani men vo udasi thi
ki dil bhi Duub gaya raat mahtab ke saath
jata diya ki mohabbat men gham bhi hote hain
diya gulab to kanTe bhi the gulab ke saath
main le uḌunga tire ḳhadd-o-ḳhal se ta.abir
na dekh meri taraf chashm-e-nim-ḳhvab ke saath
are ye sirf bahana hai baat karne ka
miri majal ki jhagḌa karun janab ke saath
visal-o-hijr ki sarhad pe jhuTpuTe men kahin
vo be-hijab hua tha magar hijab ke saath
shikasta aa.ina dekha phir apna dil dekha
dikha.i di mujhe tabir-e-ḳhvab ḳhvab ke saath
vahan milunga jahan donon vaqt milte hain
main kam-nasib tire jaise kamyab ke saath
dayar-e-hijr ke roza-guzar chahte hain
ki roza kholen tire aur sharab-e-nab ke saath
tum achchhi dost ho so mera mashvara ye hai
mila-jula na karo ‘faris’-e-ḳharab ke saath
Leave a Reply