Yaad Aa Ke Teri Hijr Mein Samjhaegi Kis Ko

Jalal Lakhnavi

yaad aa ke tiri hijr men samjha.egi kis ko

dil hi nahin siine men to bahla.egi kis ko

dam khinchta hai kyuun aaj ye rag rag se hamara

kya jaane idhar dil ki kashish la.egi kis ko

uThne hi nahin deti hai jab yaas biTha kar

phir shauq ki himmat kahin le ja.egi kis ko

jab maar hi Daala hamen be-tabi-e-dil ne

karvaT shab-e-furqat men badalva.egi kis ko

mar ja.enge be-maut gham-e-hijr ke maare

aa.egi to ab zinda ajal pa.egi kis ko

achchha rahe tasvir kisi ki mire dil par

kam-baḳht na Thahrega to Thahra.egi kis ko

kuchh baiTh gaya dil hi yahan baiTh ke apna

ghairat tiri mahfil se ab uThva.egi kis ko

is va.ada-ḳhilafi ne agar jaan hi le li

phir jhuTi tasalli tiri taḌpa.egi kis ko

kyuun lenge ‘jalal’ aa ke mire dil men vo chuTki

jhapkegi palak kaahe ko niind aa.egi kis ko