kab dil shikast-gan se kar arz-e-hal aaya
hai be-sada vo chini jis men ki baal aaya
siine se main dua ko laaya jo shab labon tak
kahne lagi ijabat kidhar khayal aaya
kaunain tak mili thi jis dil ki mujh ko qimat
qismat ki yak nigah par ja us ko daal aaya
bakhshish pe do jahan ke aai thi himmat-e-dahr
lekin na yaan zaban tak harf-e-saval aaya
nazan na ho tu is par gar tujh ko sang men se
gauhar nikalne ka kasb o kamal aaya
arbab-e-fahm aage vo sahab-e-hunar hai
kiina kisi ke dil se jis ko nikal aaya
dair-e-kharab men kal ik mast ki zaban par
ye sher us jagah ke kya hasb-e-hal aaya
aamal dekh tere mai sharm se araq hai
ai mohtasib tujhe bhi kuchh infial aaya
milne ka ek dam bhi yaan zoaf-e-dil hai maane
ukta ke uth gaya vo tab main bahal aaya
nakhl-e-hayat apna gulshan men baghban ne
boya to tha havas kar lekin na paal aaya
iksir hai to kya hai vo musht-e-khak ‘sauda’
khatir pe jab kisi ki jis se malal aaya