Karun Tujhse Bewafai Ye Kabhi Rawa Nahin Tha

Farkhanda Rizvi

karun tujh se bevafa.i ye kabhi rava nahin tha

use bevafa na kahna ki vo bevafa nahin tha

ye kisi ki sazishen thiin ya thi marzi-e-zamana

mira tujh se duur hona mira faisla nahin tha

kahin duur aa ga.i thi main hudud-e-zindagi se

mire paas vapsi ka koi rasta nahin tha

mire halat-e-zubun se tha har ek shaḳhs vaqif

main ye kaise maan ja.un ki tujhe pata nahin tha

rahi saath zindagi ke main kuchh aise zindagi bhar

mira zindagi se jaise koi vasta nahin tha

rahe dil pe ai zamane tira zor-o-jabr kab tak

kya faqat tira ḳhuda tha kya mira ḳhuda nahin tha

use bhulne ki ‘ḳhanda’ ki hazar baar koshish

use bhulne ka lekin mujhe hausla nahin tha