ji bahalta hi nahin saans ki jhankaron se
phoḌ luun sar na kahin jism ki divaron se
apne riste hue zaḳhmon pe chhiḌak leta huun
raakh jhaḌti hai jo ehsas ke angaron se
giit ga.un to lapak jaate hain sho.ale dil men
saaz chheḌun to nikalta hai dhuan taron se
kasa-e-sar liye phirti hain vafa.en ab bhi
ab bhi teshon ki sada aati hai kohsaron se
zinda lashen bhi dukanon men saji hain shayad
bu-e-ḳhun aati hai khulte hue bazaron se
kya mire aks men chhup ja.enge un ke chehre
itna puchhe koi un a.ina-bardaron se
pyaar har-chand jhalakta hai un ankhon se magar
zaḳhm bharte hain ‘muzaffar’ kahin talvaron se
Leave a Reply