jin zaḳhmon par tha naaz hamen vo zaḳhm bhi bharte jaate hain
sansen hain ki ghaTti jaati hain din hain ki guzarte jaate hain
divar hai gum-sum dar tanha phir hote chale hain shajar tanha
kuchh dhuup si Dhalti jaati hai kuchh saa.e utarte jaate hain
ham yunhi nahin hain sust-qadam ham jante hain farda kya hai
shayad koi de avaz hamen rah rah ke Thaharte jaate hain
avaz vo shisha-e-nazuk hai mehrab-e-nazar men rahne de
kyuun farsh sama.at par gir kar reze ye bikharte jaate hain
ro.en ya hansen is halat par ehsas ye hota hai aksar
va.ada to kisi se ‘shaz’ na tha ham hain ki mukarte jaate hain
Leave a Reply