bhula diya bhi agar jaa.e sarsari kiya jaa.e
mutale.a miri vahshat ka lazmi kiya jaa.e
ham aise log jo a.inda o guzishta hain
hamare ahd ko maujud se tahi kiya jaa.e
ḳhabar mili hai ki us ḳhush-ḳhabar ki aamad hai
so ehtimam-e-suḳhan aaj multavi kiya jaa.e
hamen ab apne na.e raste banane hain
jo kaam kal hamen karna hai vo abhi kiya jaa.e
nahin ba.iid ye ahkam-e-taza jaari hon
ki gumbadon se parindon ko ajnabi kiya jaa.e
bas ek lamha tire vasl ka mayassar ho
aur us visal ke lamhe ko da.imi kiya jaa.e
Leave a Reply