Roohi Kanjahi
mere liye vo shaḳhs musibat bhi bahut hai
sach ye bhi hai us ki mujhe aadat bhi bahut hai
milta hai agar ḳhvab men milta to hai koi
us ki ye inayat ye muravvat bhi bahut hai
us ne mujhe samjha tha kabhi pyaar ke qabil
ḳhush rahna ho to itni masarrat bhi bahut hai
ulfat ka nibhana to baḌi baat hai lekin
is daur men iz.har-e-mohabbat bhi bahut hai
jaane pe ba-zid hai to kahun is ke siva kya
ai dost tiri itni rifaqat bhi bahut hai
ik fasla qaa.em hai ba-dastur ba-har-hal
hasil mujhe us shaḳhs ki qurbat bhi bahut hai
jiina to paḌega hi baghair us ke bhi ‘ruhi’
halanki mujhe us ki zarurat bhi bahut hai
Leave a Reply