safar ki dhuup ne chehra ujaal rakkha tha
vo mar gaya to sirhane visal rakkha tha
hasin chehre kashida kiye the mitti se
bala ka khaak men husn o jamal rakkha tha
vo hashiyon men tire surmagin mohabbat thi
ki ainon men koi aks daal rakkha tha
falak ki saans ukhadne lagi to raaz khula
ki asman ko zamin ne sambhal rakkha tha
tira uruuj tha suraj ke maand padne tak
mire nasib men shab sa zaval rakkha tha
hisar-e-khvab se bahar kabhi nikal na sakun
bichha ke raah men palkon ka jaal rakkha tha
vo ek shakhs jo vaqt-e-zaval mujh se mila
sunahri ankhon men us ki malal rakkha tha
kisi ko sahra-navardi se ishq lahaq tha
kisi ko shauq ne ghar se nikal rakkha tha
usi ne zahr undela hai meri nas nas men
jo astin men ik saanp paal rakkha tha