shaḳh-e-mizhgan-e-mohabbat pe saja le mujh ko
barg-e-avara huun sarsar se bacha le mujh ko
rat-bhar chand ki ThanDak men sulagta hai badan
koi tanha.i ke dozaḳh se nikale mujh ko
duur rah ke bhi hai har saans men ḳhushbu teri
main mahak ja.un jo tu paas bula le mujh ko
main tiri aankh se Dhalka hua ik aansu huun
tu agar chahe bikharne se bacha le mujh ko
shab ghanimat thi ki ye zaḳhm-e-nazara to na tha
Das ga.e sub.h-e-tamanna ke ujale mujh ko
main munaqqash huun tiri ruuh ki divaron par
tu miTa sakta nahin bhulne vaale mujh ko
sub.h se shaam hui ruTha hua baiTha huun
koi aisa nahin aa kar jo mana le mujh ko
tah-ba-tah mauj-e-talab khinch rahi hai ‘mohsin’
koi girdab-e-tamanna se nikale mujh ko
Leave a Reply