Poet
hava ḳhamosh patte so rahe hain
abhi shaḳhon pe ghunche so rahe hain
sar-e-divar suraj tap raha hai
pas-e-divar saa.e so rahe hain
dar-e-dil par abhi dastak na dena
andhera hai ujale so rahe hain
hava-e-tund tu bhi ja ke so ja
daraḳhton par parinde so rahe hain
khuli hain shab ke darvazon ki ankhen
magar ghar ke dariche so rahe hain
baḳhil aisa nahin dekha hai dariya
ki ham sahil pe pyase so rahe hain
bahut zoron pe hai tufan lekin
samundar men jazire so rahe hain
ta.ajjub-ḳhez hai dariya ka manzar
bhanvar chup hain kinare so rahe hain
maze hain luTne valon ke ‘shahid’
ki ahl-e-shahr saare so rahe hain
Leave a Reply