Aaj Ro Kar To Dikhae Koi Aisa Rona

aaj ro kar to dikhae koi aisa rona

yaad kar ai dil-e-khamosh vo apna rona

raqs karna kabhi khvabon ke shabistanon men

kabhi yadon ke sutunon se lipatna rona

tujh se sikhe koi rone ka saliqa ai abr

kahin qatra na girana kahin dariya rona

rasm-e-duniya bhi vahi rah-e-tamanna bhi vahi

vahi mil baith ke hansna vahi tanha rona

ye tira taur samajh men nahin aaya ‘mushtaq’

kabhi hanste chale jaana kabhi itna rona

Leave a Comment