Afsos Bani Hi Nahin Pahchan Abhi Tak

Dr Azam

afsos bani hi nahin pahchan abhi tak

har ahl-e-nazar mujh se hai anjan abhi tak

sadiyon ke taghayyur se bani surat-e-insan

insan nahin hai magar insan abhi tak

ilham se ib.ham se iham se chhuTe

kitne hain ḳhayalat pareshan abhi tak

kitne hi khule fahm-o-farasat ke dariche

hain qaid-e-jahalat men ham insan abhi tak

hain dair-o-haram kuchh ki nahin dair-o-haram kuchh

Thahra nahin mera kahin iman abhi tak

ham ahl-e-tazabzub ka fasana bhi ajab hai

kafir hi bane hain na musalman abhi tak

taskin ki surat koi milti nahin ‘azam’

meri nigah-e-shauq hai hairan abhi tak