agha-shayar-qazalbash

Main Khudi Mein Mubtila Khud Ko Mitane Ke Liye

main khudi men mubtila khud ko mitane ke liye

tu ne to har zarre ko zau di jagmagane ke liye

ek adna se patinge ne bana di jaan par

shama ne koshish to ki thi dil jalane ke liye

barq-e-khirman sozab rakhna zara chashm-e-karam

chaar tinke phir jade hain ashiyane ke liye

munh nahin har ek ka jo sakhti-e-gardun sahe

kuchh kaleja chahiye vo zakhm khane ke liye

khuub bulbul ko sikhaya nala-e-mastana-var

khuub ghunche ko samajh di muskurane ke liye

is qadar arzan hui hai aaj kal jins-e-kamal

jhute sikke Dhal rahe hain har khazane ke liye

khvab men bhi ab nahin ‘shair’ vo garmi-e-kalam

shama si ik rah gai hai jhilmilane ke liye

More Poems

Leave a Comment