Ghayas Mateen
jazire hon ki vo sahra hon ḳhvab hona hai
samundaron ko kisi din sarab hona hai
saval puchhne vaalo tumhen bhi aḳhir-e-kar
rahin-e-minnat-e-bar-e-javab hona hai
khanDar men baiTh ke rone ki ḳhu nahin jaati
tumhari aankh pe shayad azaab hona hai
vo zulmaten jo ujalon ke ghar men rahti hain
unhen bhi misl-e-sahr be-naqab hona hai
vo din jo niili kitabon men band hai us ko
abhi to mere liye be-hijab hona hai
abhi to ḳhvahish-e-be-dast-o-pa salamat hai
abhi kuchh aur ye ḳhana-ḳharab hona hai
ye shaḳh shaḳh parinde pukarte hain ‘matin’
hamen to shaḳh se gir kar gulab hona hai
Leave a Reply