Zafar Iqbal
abhi kisi ke na mere kahe se guzrega
vo khud hi ek din is daere se guzrega
bhari rahe abhi ankhon men us ke naam ki niind
vo khvab hai to yunhi dekhne se guzrega
jo apne aap guzarta hai kucha-e-dil se
mujhe guman tha mire mashvare se guzrega
qarib aane ki tamhid ek ye bhi rahi
vo pahle pahle zara fasle se guzrega
qusur-var nahin phir bhi chhupta phirta huun
vo mera chor hai aur samne se guzrega
chhupi ho shayad isi men salamti dil ki
ye rafta rafta agar tutne se guzrega
hamari sada-dili thi jo ham samajhte rahe
ki aks hai to isi aine se guzrega
samajh hamen bhi hai itni ki us ka ahd-e-sitam
guzarna hai to ab hausle se guzrega
gali gali mire zarre bikhar gae the ‘zafar’
khabar na thi ki vo kis raste se guzrega
Leave a Reply