duur duur mujh se vo is tarah khiraman hai
har qadam hai naqsh-e-dil har nigah rag-e-jan hai
ban gai hai masti men dil ki baat hangama
qatra thi jo saghar men lab tak aa ke tufan hai
ham to pa-e-jan par kar bhi aae ik sajda
sochti rahi duniya kufr hai ki iman hai
mere shikva-e-gham se alam-e-nadamat men
is lab-e-tabassum par shama si farozan hai
ye niyaz-e-gham-khvari ye shikast-e-dildari
bas navazish-e-janan dil bahut pareshan hai
muntazir hain phir mere hadse zamane ke
phir mira junun teri bazm men ghazal-khvan hai
fikr kya unhen jab tu saath hai asiron ke
ai gham-e-asiri tu khud shikast-e-zindan hai
apni apni himmat hai apna apna dil ‘majruh’
zindagi bhi arzan hai maut bhi faravan hai
Leave a Reply