qaid-e-dil se hai miri kakul-e-pechan nazan
aur mire qatl se hai khanjar-e-mizhgan nazan
hai miri changul-e-vahshat se gareban nazan
aur miri barish-e-ashkon se hai daman nazan
kafir-e-ishq hua jab se main is dahr men huun
hai mire kufr se ye diin aur iman nazan
zakhm khane se mire fakhr-kunan hai ye dil
khun-e-dil se hain mire dida-e-giryan nazan
sakin-e-khana-e-zanjir hua huun jab se
misl har halqa-e-zanjir hai zindan nazan
huun vo majnun ki mire abla-ha-e-pa se
dasht-e-vahshat men hai har khar-e-bayaban nazan
mahv-e-ishq-e-shah-e-khadim huun main ‘asim’ yaksar
husn par jis ke hain ye mere dil-o-jan nazan
Leave a Reply