ye ḳhvab aur bhi dekhenge raat baaqi hai
abhi to ai dil-e-zinda hayat baaqi hai
mire lahu men abhi tark-e-ishq ke ba-vasf
vo garmi-e-nigah-e-iltifat baaqi hai
abhi to zauq-e-talab men kami nahin aa.i
abhi mira safar-e-be-jihat baaqi hai
jo ho sake to shahadat-gah-e-nazar men aa
ye dekh ishq men kitna sabat baaqi hai
ye ka.enat abhi ek intizar men hai
ki hone vaali koi vardat baaqi hai
ḳhud apni raakh se tu ji uThe sharar ki tarah
ye mo.ajiza abhi ai ka.enat baaqi hai
shab-e-visal men din bhi mila na len ai dost
ki raat ḳhatm hui aur baat baaqi hai
hui hai shaḳh-e-hunar men na.i numu ab ke
‘salim’ barg-e-ḳhizan se najat baaqi hai
Leave a Reply