dushvar hai ab rasta asan se aage
rakh umar-e-kuhan pichhla qadam dhyan se aage
aTka hua suraj hai isi ek sabaq par
baḌhta nahin din raat ki gardan se aage
qismat ki ḳharabi hai ki jaata huun ghalat samt
paḌta hai bayaban bayaban se aage
pahuncha to nahin main dar-e-vaslat pe magar haan
sunta huun kahin hai shab-e-hijran se aage
na taḳht na abad koi shahr saba ka
ik girya hai divar-e-sulaiman se aage
ḳhamyaza hai is adat-e-israf ka aur bas
jo be-sar-o-samani hai saman se aage
kal shor bapa dil men tha pahchan ki ḳhatir
ab sakta hai azar ka pahchan se aage
nikli na kisi ek ki ta.abir muafiq
sau ḳhvab the har ḳhvab-e-pareshan se aage
Leave a Reply