umr guzri rahguzar ke as-pas
raqs karte us nazar ke as-pas
zulf khulti hai to uThta hai dhuan
abshar-e-chashm-e-tar ke as-pas
kaundti hain bijliyan barsat men
ta.ir-e-be-bal-o-par ke as-pas
raat bhar avara patte aur hava
raqs karte hain shajar ke as-pas
chhoḌ aaya huun mata-e-jan kahin
ghaliban us rahguzar ke as-pas
baal bikhra.e ye buḌhi chandni
DhunDti hai kya khanDar ke as-pas
is gali men ek laḌka aaj bhi
ghumta rahta hai ghar ke as-pas
ek surat-ashna saa.e ki dhuup
paḌ rahi hai bam-o-dar ke as-pas
kaise pur-asrar chehre hain ‘rasa’
ḳhvab-gah-e-shisha-gar ke as-pas
Leave a Reply