diyat is qatil-e-be-rahm se kya lijiyega
apni hi ankhon se ab khuun baha lijiyega
phir nahin hone ki taqsir to aisi hargiz
ab kisi tarah meri jaan bacha lijiyega
is qadar sang-dili tum ko nahin hai lazim
kisi mazlum ki gaahe to dua lijiyega
lakht-e-dil khaak men deta hai koi bhi rahne
gir pade ashk to ankhon se utha lijiyega
phir na pachhtao kahin baad mire jaane ke
galiyan aur hon baaqi to suna lijiyega
ruuth kar jaae koi apne se pyare to vahin
chahiye aap gale pad ke mana lijiyega
apne mushtaq ko lazim hai ki gaahe maahe
ghair ki aankh bacha ghar men bula lijiyega
ek muddat hui kuchh harf-o-hikayat hi nahin
ji men hai aaj to baton men laga lijiyega
kisi jalse men jo ‘iman’ kaho to janen
ghar men yuun baithe hue sher bana lijiyega