kahin par sub.h rakhta huun kahin par shaam rakhta huun
phir is be-rabt se khake men khud se kaam rakhta huun
saliqe se main us ki guftugu ka lutf leta huun
aur us ke ru-ba-ru dil men khayal-e-kham rakhta huun
ba-zahir mad.h se us ki kabhi thakta nahin lekin
darun-e-khana-e-dil khvahish-e-dushnam rakhta huun
khush aai hai abhi to qaid-e-khvahish is kharabe men
abhi khud ko rahin-e-gardish-e-ayyam rakhta huun
safar ki sub.h men ranj-e-safar ki dhuul udti hai
had-e-aghaz men andesha-e-anjam rakhta huun
firaq o vasl se hat kar koi rishta hamara hai
ki us ko chhod paata huun na us ko thaam rakhta huun
dalil-e-khvab-e-masti hai tiri amadgi imshab
magar is shab men tujh se aur koi kaam rakhta huun
tajavuz se bhala kab tak guzar auqat mumkin thi
so apne khuun tak shor-e-dil-e-badnam rakhta huun
Leave a Reply