yuun to ikhlas men is ke koi dhoka bhi nahin
kab badal jaae magar is ka bharosa bhi nahin
kaat di vaqt ne zanjir-e-taalluq ki kadi
ab musafir ko koi rokne vaala bhi nahin
phir na yadon ke kahin band dariche khul jaaen
muddaton se tiri tasvir ko dekha bhi nahin
jal gaya dhuup men yadon ka khunuk saaya bhi
be-nava dasht-e-bala men koi ham sa bhi nahin
thak gae hain mire nakam iradon ke qadam
ab nigahon men koi shauq ka sahra bhi nahin
aaine aks se mahrum nigah manzar se
ab ye tanhai ka aalam hai ki saaya bhi nahin
ai miri umr ke maazur guzarte lamho
tum ne jaate hue mud kar kabhi dekha bhi nahin