miri ghazal jo na.e saaz se ibarat hai
mire nafas miri avaz se ibarat hai
khaTak raha hai jo nashtar jarahat-e-dil men
fareb-e-nargis-e-tannaz se ibarat hai
haqiqaton ko fasana bana diya jis ne
ye sehr bhi tire e.ajaz se ibarat hai
qafas bhi jaise daricha hai dil ke zindan ka
nafas bhi lazzat-e-parvaz se ibarat hai
mire lahu ki ye gardish usi ka jaadu hai
ye harf-e-dil jo tire raaz se ibarat hai
jahan-o-jan ka sitam aarzu ka lutf-o-karam
tiri ada se tire naaz se ibarat hai
na aa saka mire ash.ar men ‘salim’ ka rang
jo us ke munfarid andaz se ibarat hai
Leave a Reply