raz-e-hasti tishna-e-ta.abir hai tere baghair
zindagi taqsir hi taqsir hai tere baghair
ziist ki har kamyabi bhi miri nazron men ḳhaak
ek be-buniyad si ta.amir hai tere baghair
jis ko hona chahiye tha taza-dam kaliyon ka haar
vo nafas ka silsila zanjir hai tere baghair
haan vahi lab jo tabassum ka ḳhazana tha kabhi
aaj rehn-e-nala-e-shab-gir hai tere baghair
dil ki halat hai ki jaise ik tilism-e-be-kalid
har tamanna harf-e-be-ta.abir hai tere baghair
ho nahin paati koi asan si mushkil bhi sahl
kund sa har naḳhun-e-tadbir hai tere baghair
chand barsata hai jab raton ko amrit ki phuvar
haan usi ki har laḌi ik tiir hai tere baghair
raushni us ke kisi ruḳh par bhi aa paati nahin
zindagi dhundli si ik tasvir hai tere baghair
aa agar begana-e-ehsas tera dil nahin
tera ‘mulla’ ḳhasta-o-dil-gir hai tere baghair
Leave a Reply