kya phir zamin dil ki namnak ho rahi hai
ik bel aarzu ki pechak ho rahi hai
yalghar kar raha hai ik raushni ka lashkar
tarikiyon ki chadar phir chaak ho rahi hai
us ko sikha raha hai ayyariyan zamana
duniya bhi rafta rafta chalak ho rahi hai
us ne bana diya hai matam-kada jahan ko
ḳhilqat fasurdagi ki ḳhurak ho rahi hai
us ke sabab se jiina dushvar ho gaya hai
is baat ki mazammat kya ḳhaak ho rahi hai
Leave a Reply