bichhaḌ kar us ka dil lag bhi gaya to kya lagega
vo thak ja.ega aur mere gale se aa lagega
main mushkil men tumhare kaam aa.uun ya na aa.uun
mujhe avaz de lena tumhen achchha lagega
main jis koshish se us ko bhuul jaane men laga huun
ziyada bhi agar lag jaa.e to hafta lagega
mire hathon se lag kar phuul miTTi ho rahe hain
miri ankhon se dariya dekhna sahra lagega
mira dushman suna hai kal se bhuka laḌ raha hai
ye pahla tiir us ko nashte men ja lagega
ka.i din us ke bhi sahraon men guzre hain ‘hafi’
so is nisbat se a.ina hamara kya lagega
Leave a Reply