ḳhushbu ka jism nuur ka paikar badal gaya
shabnam ki sard aag se patthar pighal gaya
titli ke pichhe dauḌte bachche ko kya mila
hathon men rang rah gaya paanv phisal gaya
anchal men dhuup zulf men sho.alon ki aanch hai
jaa.en kahan ki pyaar ka mausam badal gaya
maazi ki ḳhanqah se bahar to dekhiye
ḳhvabon ki rut chali ga.i sikka badal gaya
apna sa ye koi pas-e-a.ina kaun hai
ankhon men aaj kis liye savan machal gaya
divana chiḳh chiḳh ke malbe pe so gaya
pichhle baras yahin tha mira ghar ki jal gaya
phir aaj us ke lams men jakḌa hua huun main
phir aaj ḳhvahishon ka samundar ubal gaya
Leave a Reply