ḳhala ke dasht men ye turfa majra bhi hai
vo asman jo sar par tha zer-e-pa bhi hai
hava ke dosh pe ik surma.i lakir ke saath
miri talash men shayad miri sada bhi hai
Dara huun yuun kabhi tanha.iyon ki aahaT se
ki jaise mujh men koi shai mire siva bhi hai
bahut aziiz hai mujh ko ye barg-e-nau jis men
zamin ka husn bhi hai shoḳhi-e-saba bhi hai
miri jafa-talabi ka ḳhayal hai us ko
vagarna pyaar ka andaz dusra bhi hai
rag-e-hayat men raqsan miri tavana.i
main kaise maan luun mere liye fana bhi hai
Leave a Reply