Rishi Patialvi
atish-e-hijr ko ashkon se bujhane vaale
tujh ko rone bhi na denge ye zamane vaale
zahr-e-gham kha to sahi ai dil-e-mahrum-e-karam
pursish-e-hal ko aa ja.enge aane vaale
yaad aate hain to aa.e hi chale jaate hain
dil se jaate hain kahan dil se bhulane vaale
dava-e-did abas jur.at-e-didar ghalat
aap men aa na sake aap ko paane vaale
jab se dekha hai tujhe main ne ye main dekhta huun
mujh ko divana samajhte hain zamane vaale
dil men bhi baste hain arman-o-tamanna ki tarah
nuur ban kar meri nazron men samane vaale
vo zara mast nigahon se pila.en to sahi
hosh men a.enge ham hosh se jaane vaale
kitne ahbab ‘rishi’ ishq ka dam bharte hain
kitne hote hain magar naaz uThane vaale
Leave a Reply