jis qadar zabt kiya aur bhi rona aaya
ye tabiat nahin aai koi dariya aaya
kaam kya jazb-e-tamanna-e-zulekha aaya
karvan bhi chah-e-yusuf hi pe hota aaya
kucha-e-yar men aa kar nahin jaata koi
ye vo ja hai ki yahan jo koi aaya aaya
raat kya janiye kis tarah guzari ham ne
apne vaade pe shab-e-vaada to achchha aaya
aa gae aaj vo aghyar ke bahkane men
nahin maalum bura vaqt ye kis ka aaya
kashish-e-shauq ne majbur kiya hai sau baar
main to vaan jaane ki har baar qasam kha aaya
haath donon na hue siine se ik jaae juda
main chaman men dil-e-nashad ko bahla aaya
vaan se ye shakl banae hue aaya qasid
main ne jaana mujhe paigham qaza ka aaya
ham ne dar-parda bhi ki teri burai na kabhi
shukr kah kar bhi na lab par koi shikva aaya
vaada-e-vasl pe qasmen to na kha ahd-shikan
bavar aaya mujhe bas aur to aaya aaya
kah utha aaj ki us but ko khuda laae kahin
shukr hai lab pe mire naam khuda ka aaya
fitne qadmon se lage rahte hain goya har-dam
aap kya aae ki ik majma-e-ada aaya
ashk ankhon men bhare lab pe fughan daman-e-chak
jo tamashe ko gaya vaan se tamasha aaya
girye ko zabt kiya ruk na sake naale aah
tukde ho ho ke mire munh ko kaleja aaya
jis ne dekha mujhe fariyad-kunan vaan ‘salik’
rahm kaisa vo bura mujh ko hi kahta aaya
Leave a Reply