Khalid Jamal
ishq hai vahshat hai kya hai kuchh pata to chahiye
kya kahun main us se aḳhir mudda.a to chahiye
darguzar kar mere malik tu nazar aata nahin
sar jhukane ke liye koi pata to chahiye
raat ki palken bhi ḳhali ghar ke angan ki tarah
raushni ke vaste koi diya to chahiye
sar-ḳhamida shahr men us ke harim-e-naz tak
bu-e-gul ke vaste dast-e-saba to chahiye
ḳhat-kashida saari tahriren usi ke naam hain
harf-e-haq ko izn de saut-o-sada to chahiye
raat ki shaḳhon pe kuchh ḳhvabon ke gul-buTe saja
jagti ankhon ko aḳhir aasra to chahiye
Leave a Reply