Zulfiqar Aadil
ye mez ye kitab ye divar aur main
khiḌki men zard phulon ka ambar aur main
har shaam is ḳhayal se hota hai ji udaas
panchhi to ja rahe hain ufuq paar aur main
ik umr apni apni jagah par khaḌe rahe
ik dusre ke ḳhauf se divar aur main
sarkar har daraḳht se bante nahin hain taḳht
qurban aap par mire auzar aur main
le kar to aa gaya huun mire paas jo bhi tha
ab sochta huun tera ḳharidar aur main
ḳhushbu hai ik fazaon men phaili hui jise
pahchante hain sirf sag-e-yar aur main
kho.e huon ko DhunDne nikla tha aftab
duniya to mil ga.i sar-e-bazar aur main
Leave a Reply