Zafar Iqbal
badla ye liya hasrat-e-izhar se ham ne
aghaz kiya apne hi inkar se ham ne
darvaza nahin apne sarokar men shamil
hai rabta rakkha hua divar se ham ne
imkan sa khola hua sahil ki hava par
ummid si bandhi hui us paar se ham ne
apni hi bigadi hui surat ke alava
kuchh aur nikala nahin tumar se ham ne
is ka bhi koi faeda pahuncha na kisi ko
asan jo baramad kiya dushvar se ham ne
manzil jo hamari thi kahin rah gai pichhe
ye kaam liya tundi-e-raftar se ham ne
ye dhuup hi thi apni guzargah so rakkha
ik fasla bhi saya-e-ashjar se ham ne
jancha hai kisi aur tariqe se ye sab kuchh
parkha hai kisi apne hi meaar se ham ne
us ki bhi ada ki hai ‘zafar’ aaj to qimat
jo chiiz kharidi nahin bazar se ham ne
Leave a Reply