hai aarzu ki aur to kya ḳhud ḳhuda na ho
jab vo ho mere paas koi dusra na ho
divar se kahi thi jo us tak pahunch ga.i
is baat par hi mujh se kahin vo ḳhafa na ho
aahaT bhi koi pa na sake ghar se yuun nikal
har samt dekh-bhal koi dekhta na ho
saaya bhi saath le ke na ja ku-e-yar men
ham-zad bhi safar men kahin runuma na ho
vo raah kar talash ki jo sanglaḳh ho
DhunDe koi to tera kahin naqsh-e-pa na ho
mumkin kahan ki aḳhir-e-shab dar pe ho koi
dastak si ho rahi hai jo bahar hava na ho
Leave a Reply