mira hi ban ke vo but mujh se ashna na hua
vo be-niyaz tha itna to kyuun ḳhuda na hua
shikan hamesha jabin par rahe to aadat hai
mujhe yaqin hai vo mujh se kabhi ḳhafa na hua
tamam umr tiri ham-rahi ka shauq raha
magar ye ranj ki main mauja-e-saba na hua
hijab-e-husn se baḌhti hai var-e-uryani
yahi sabab hai main azurda-e-haya na hua
nashat-e-hijr ka ḳhugar bana diya hota
jafa-e-yar se itna bhi haq ada na hua
hayat-o-hijr ka ḳhud main ne intiḳhab kiya
main qaid kab tha jo main qaid se riha na hua
dayar-e-dard men dil ne bahut talash kiya
nasib-e-ishq magar tera naqsh-e-pa na hua
‘zahir’ soz-e-darun bhi ajab karishma hai
main duur rah ke bhi us se kabhi juda na hua
Leave a Reply