Mohammad Sharfuddin Sahil
hujum-e-gham men bahar-hal muskurana hai
hava ke ruḳh pe charagh-e-yaqin jalana hai
hai dil-ḳharash bahut yaad mere maazi ki
use harim-e-ghazal men mujhe sajana hai
gunah ke ḳhauf se insan kaanp jaata tha
ye vaqi.a to hai lekin bahut purana hai
tamam shahr pe hakim ka jabr hai ghalib
ye kya ki naaz bhi us ka hamen uThana hai
jadid daur men as.hab-e-kahf ke manind
qadim daur ka sikka hamen chalana hai
jinhen hai zo.am bahut apni be-gunahi par
unhen bhi chal ke zara a.ina dikhana hai
charagh azm ka tum saath le chalo ‘sahil’
hava ke zor-e-musalsal ko azmana hai
Leave a Reply