Hatim Ali Mehr
karte hain shauq-e-did men baten hava se ham
jaate hain ku-e-yar men pahle saba se ham
pichhe kahin rahe nahin ah-e-rasa se ham
jaate hain ku-e-yar men pahle saba se ham
iiza ki apni fikr karenge dava se ham
dhundenge koi maut ka nuskha shifa se ham
zahid bura na manenge is bad-dua se ham
hon but-parast chahte hain ye khuda se ham
uljhenge ek baar to zulf-e-dota se ham
saudai huun sadi huun tumhari bala se ham
tegh-e-nigah na tir-e-mizha ne kiya halak
haan mar gae hain aap hi apni qaza se ham
na-qadr se hi qadr ki ummid hai abas
o be-vafa khajil hue apni vafa se ham
ghar ja ke un ke rog laga laae ishq ka
bimar ho ke aae hain darushshifa se ham
ab-e-hayat khizr-o-sikandar ko chahiye
saaqi faqat sharab ke hain ik piya se ham
bole masih dekh ke bimar-e-ishq ko
majbur hain isi maraz-e-la-dava se ham
jheli hui hain ishq men lakhon musibaten
darte nahin hai aap ke jaur-o-jafa se ham
ghar men huzur ke hamen sona nasib ho
aae hain maal marne daulat-sara se ham
gulzar hai shahidon ka jannat ka ham-savad
jaenge to na aenge phir karbala se ham
qismat ka apni pech hua gesuon ka pech
badlen siyah tale-e-zill-e-huma se ham
dil men tire asar na hua arsh hil gaya
nadim hain na-rasai-e-ah-e-rasa se ham
achchha hua na dafn hui naash baad-e-marg
kya musht-e-ustukhvan ko chhupate huma se ham
sote nahin hain raat ko bhi ham to chain se
karte hain ‘mehr’ uns jo ik mah-laqa se ham
Leave a Reply