raste yaad nahin rah-numa yaad nahin
ab mujhe kuchh tiri galiyon ke siva yaad nahin
phir ḳhayalon men vo biite hue savan aa.e
lekin ab tujh ko papihe ki sada yaad nahin
ek va.ada tha jo shishe ki tarah TuuT gaya
hadisa kab ye hua kaise hua yaad nahin
ham diya karte the aghyar ko ta.ana jin ka
ab to ham ko bhi vo adab-e-vafa yaad nahin
vaz.a-dari se hai majbur mira pyaar ‘qatil’
sab purane hain koi daagh naya yaad nahin
Leave a Reply