aisha-ayyub

Wo Ab dil Se Tumhaare Ja Raha Hai

vo ab dil se tumhare ja raha hai

tumhen us ka ḳhayal ab aa raha hai

main us ke saath ko tarsa karungi

jo mere saath bhi tanha raha hai

to ab ye dukh bhi duniya baanT legi

mujhe is baat ka gham kha raha hai

use tum se mohabbat ho gai hai

tumhare samne sharma raha hai

bahut se log mujh men ro rahe hain

bas ik vo hai ki hansta ja raha hai

jo raste men akela rah gaya tha

vo sab ko rasta dikhla raha hai

ba-sharte ye ki koi bhi na nikle

har ik darvaza khola ja raha hai

mulavvis hai gunahon men to vo bhi

ḳhuda ka zikr jo karta raha hai

baharon se use kya lena dena

jo andar se hi ab murjha raha hai

tumhen achchhi nahin lagti ye duniya

farishton se ye puchha ja raha hai

ghazal ke sher to sab ho gae hain

mukammal ek hi misra raha hai

More Poems

Leave a Comment