Ek Nazar Mein dard Kho dena dil-e-Bimar Ka

ik nazar men dard kho dena dil-e-bimar ka

ye to adna sa karishma hai nigah-e-yar ka

ghair mumkin hai ki ho pamal koi hashr men

ho na jab tak kuchh ishara aap ki raftar ka

hazrat-e-adam se ta iin dam hue sab ishq dost

hai azal se daur daura husn ki sarkar ka

ham jo mar kar ji uThe is par ta.ajjub kya ki hai

vo karamat chaal ki ye mojaza guftar ka

aap ke ghamze uTha.un ghair ke taane sunun

banda parvar main ne chhoḌa ishq bhi sarkar ka

ablon ko sar uThane ki zara mohlat nahin

hai karam sahra-navardi men ye nok-e-ḳhar ka

is se baḌh kar aap ‘ahsan’ chahte hain aur kya

doston ki daad hai goya sila ash.ar ka

Leave a Comment