kaun karta hai sar-e-zulf ki baten dil men
ji pe katti hain ajab tarah ki raten dil men
koi tarkib mulaqat ki banti nahin aur
vasl ke roz kiya karte hain ghaten dil men
go hamen tu ne ye zahir men navaza par ham
dhyan men apne tiri khate hain laten dil men
turfa shatranj-e-mohabbat ki hai ghaeb baazi
shatir-e-ishq ko ho rahti hain maten dil men
kaun si an-o-ada hai ki nahin ji ko lage
khub rahi hain vo tiri sab harakaten dil men
zaat gar pochhiye aadam ki to hai ek vahi
laakh yuun kahne ko thahraiye zaten dil men
vasl ka saad bhi hoega ‘hasan’ sabr karo
daftar-e-ishq ki dauden hain baraten dil men