tegh-e-nigah-e-dida-e-khun-khar nikali
kyuun aap ne ushshaq pe talvar nikali
bhule hain ghazalan-e-haram raah khata se
tum ne ajab andaz ki raftar nikali
dhadka mire naale ka raha murgh-e-sahar ko
avaz shab-e-vasl na zinhar nikali
har ghar men kahe rakhte hain kohram padega
gar laash hamari sar-e-bazar nikali
akhir miri turbat se ugi hai gul-e-nargis
kya bad-e-fana hasrat-e-didar nikali
main vasl ka saail huun na vaade ka talab-gar
baton men abas aap ne takrar nikali
jal jaega ye khirman-e-hasti abhi ai dil
siine se agar ah-e-sharar-bar nikali
dil le ke bhi ‘raana’ ka kiya paas na afsos
kuchh hasrat-e-dil tu ne na ayyar nikali
Leave a Reply