achchha huun ya bura huun mujhe kuchh nahin pata
nazron men tere kya huun mujhe kuchh nahin pata
kya tujh men DhunDhta huun mujhe kuchh nahin pata
main tera ho gaya huun mujhe kuchh nahin pata
agah huun main manzil-e-maqsud se magar
kis samt ja raha huun mujhe kuchh nahin pata
avaz de raha hai mujhe kaun baar baar
kis ke liye ruka huun mujhe kuchh nahin pata
itna mujhe pata hai tumhen huun aziiz main
lekin tumhara kya huun mujhe kuchh nahin pata
dimak ki tarah chaaT raha hai jo kaun hai
kis gham men ghul raha huun mujhe kuchh nahin pata
main ḳhuub janta huun ye manzil nahin miri
aa kar kahan ruka huun mujhe kuchh nahin pata
rahta huun kis ḳhayal men ‘nayab’ in dinon
kya kya main sochta huun mujhe kuchh nahin pata
Leave a Reply