ye aarzu hain ham koi aarzu karte
asiir ḳhud ko na ham dam-e-rang-o-bu karte
itab-bin jo hamare hain nukta-chin ham par
kahin jo milte to ham khul ke guftugu karte
vo aa.ina jo kare harf-giri-e-kirdar
jo haath aa.e to logon ke ru-ba-ru karte
kahin suragh-e-ḳhulus-o-vafa agar milta
to apni zaat ko ham vaqf-e-justuju karte
ham aaj ashk-ba-daman jo hain to rona kya
tamam-umr hi guzri hai ha-o-hu karte
misal-e-a.ina rakhte jo dil men aks-e-jamil
kabhi tabah na shishe ki aabru karte
ḳharab hote ḳharabe men aur kya hota
huzur-e-saqi agar ham subu subu karte
hamen bhi kaash jo taufiq-e-aizdi hoti
to ham bhi kausar-o-tasnim se vuzu karte
yaqin jo hota ki honge halak sidq-o-vafa
to ehtimam se marne ki aarzu karte
hamen bhi raas jo aati shaguftagi dil ki
to ‘lais’ ham bhi kabhi jur.at-e-numu karte
Leave a Reply