din ke paas kahan jo ham raton men maal banate hain
bad-halon ko ḳhvab hi shab bhar ko ḳhush-hal banate hain
us ko tasavvur tak laane men aap hi kho jaate hain ham
ḳhud hi phans jaate hain ham aur ḳhud hi jaal banate hain
adab ke bazaron men in sheron ki qimat kya ma.alum
ham to ḳhali kari-gar hain ham to maal banate hain
maah o saal ke malik lamhon se bhi rahte hain mahrum
ham ko dekho lamhon se bhi maah o saal banate hain
hijr men socha tha ab dil ko pakka kar lenge lekin
vasl ke va.ade dil ke aahan ko sayyal banate hain
Leave a Reply