Gulzar Dehlvi
zindagi rah-e-vafa men jo miTa dete hain
naqsh ulfat ka vo duniya men jama dete hain
is tarah jurm-e-mohabbat ki saza dete hain
vo jise apna samajhte hain miTa dete hain
ek jul roz hamen aap naya dete hain
va.ada-e-vasl ko baton men uḌa dete hain
ḳhum-o-mina-o-subu bazm men aate aate
apni ankhon se ka.i jaam pila dete hain
husn ka koi juda to nahin hota andaz
ishq vaale unhen andaz sikha dete hain
kosne dete hain jis vaqt butan-e-tannaz
haath uTha.e hue ham un ko dua dete hain
mere ḳhvabon men bhi aate hain adu ke hamrah
ye vafaon ka miri aap sila dete hain
halat-e-ghair pe yuun ḳhair se hansne vaale
is tavajjoh ki bhi ham tum ko dua dete hain
shahar men roz uḌa kar mire marne ki ḳhabar
jashn vo roz raqibon ka mana dete hain
dair-o-ka.aba ho kalisa ho ki mai-ḳhana ho
sab har ik dar pe tujhi ko to sada dete hain
ishva-o-husn-o-ada par tiri marne vaale
kitne ma.asum yunhi umr ganva dete hain
pa.e gul-gasht vo gul-posh jo aa.e ‘gulzar’
zindagi sabze ke manind bichha dete hain
Leave a Reply