na koi naam o nasab hai na goshvara mira
bas apni ab-o-hava hi pe hai guzara mira
miri zamin pe tire aftab raushan hain
tire falak pe chamakta hai ik sitara mira
jo chahta hai vo taskhir kar le duniya ko
kisi bhi shai pe nahin hai yahan ijara mira
main ham-kanar hua ek lahar se aur phir
kinare hi men kahin gum hua kinara mira
bas ek lamha-e-benam ki giraft men hain
na jaane kaisa taalluq hai ye tumhara mira
to phir jo nafa hai main us men kyuun nahin shamil
agar yahan ka khasara hai sab khasara mira
jo dhyan tak nahin deta hai meri baton par
samajh raha hai vahi shakhs to ishara mira
kahin khushi ki numaish men rakh diya ja kar
kal us ne basta-e-gham taaq se utara mira
vahi hai til vahi rukhsar hain vahi tu hai
magar nahin hai samarqand aur bukhara mira
main baad o baran se atish kashid karta huun
ki aab o khaak ki tamsil hai idara mira
ab aa gaya huun to socha sada lagata chalun
kise khabar yahan aana na ho dobara mira
darun-e-khana koi bhi nahin kisi ka ‘salim’
pe dekhne men to lagta hai shahr saara mira