Main Zahr Rahi Har Sham Rahi

main zahr rahi har shaam rahi

barish ki hava badnam rahi

patal men dariya jazb hue

main sat.h rahi do-gam rahi

imkan-e-asar par shama-e-dua

bujhne ki ada ka naam rahi

mire tanha dasht ke jazbon men

tiri yaad tah-e-alam rahi

konpal ko dhuup hava se kya

mitti ki nami nakam rahi

badal miri chhat par kab thahre

divar pe gahri shaam rahi

is ghar ke andhere lamhon men

bas ek kiran sar-e-bam rahi

main chhanv ke sukh se laut gai

tiri dhuup mira aram rahi

Leave a Comment